Num 9 | MEU | STEP | Israel taudia ese Aigupto tanona amo e raka lasi murinai, laḡani iharuana ena hua gini-gunana ai Iehova ese Mose e hereva henia Sinai tano ḡaḡaenaai,

Numbers 9

Lagau Hanai Ariana

1 Israel taudia ese Aigupto tanona amo e raka lasi murinai, laḡani iharuana ena hua gini-gunana ai Iehova ese Mose e hereva henia Sinai tano ḡaḡaenaai, 2 eto, Israel taudia ese lagau-hanai ariana bae badinaia, ena nega korikoriai. 3 Una hua ena dina ihagwauta-hanina adorahina ai ba karaia, ena nega korikorina ai, taravatuna iboudiai heḡereḡerena.

4 Taunabunai, Mose ese Israel taudia e haḡanidia, lagau-hanai ariana bae karaia eto. 5 Bena hua gini-gunana ena dina ihagwauta-hanina adorahina ai lagau-hanai ariana e karaia, Sinai tano ḡaḡaena ai; Iehova ese Mose e haḡanilaia karadia iboudiai na a Israel taudia ese e karadia ḡuḡuru. 6 A tatau haida vada e taubu, mase tauna enai vada e dau kau dainai, taunabunai idia na mai edia hekwakwanai lagau-hanai ibadinana ai una dina ai, bena idia ese Mose bona Aaron dekedia ela una dina ai. 7 Idia ese Mose e hamaoroa eto, Ai a taubu, mase tauna enai vada a dau kau dainai. Badina be dahaka ai ese Iehova basia boua diba, nega korikorina ai, Israel taudia iboudiai ida 8 Mose ese e haere henidia, eto, Do ba noho, ela bona lau baina kamonai, Iehova ede baine haḡanilaigu toma umui daimui ai.

9 Bena Iehova ese Mose e haḡania, eto, 10 Israel taudia ba hamaorodia, baoto: Ena be umui emui ai eiava garamui ediai tau ta baine taubu, mase tauria enai baine dau kau dainai, eiava dauhai baine laolao, to ia be Iehova ena lagau-hanai ariana baine badinaia. 11 Idia ese hua iharuana ena dinaihagwauta-hanina adorahina ai bae karaia; mai flaoana, asie hatubua ḡauna, bona mai aniani avadia iditadia ida do bae ania. 12 Bahu basine mia rani, turiana ta danu basie hakwaidua; lagau-hanai taravatudia iboudiai heḡereḡeredia ai bae karaia. 13 A tau ta se miromu eiava se laolaomu to lagau-hanai ariana basine badinaia, una tau be ena bese amo bae negea daure; badina be Iehova se boua, nega korikorina ai. Una tau be ena dika do baine huaia. 14 Bema idau tauna ta dekemui ai baine noho hedoa, bena ia baine ura Iehova ena lagau-hanai ariana baine ania, lagau-hanai taravatudia heḡereḡeredia,ia be baine ania diba. Emui taravatu baine tamona, noho-hedoa taudia bona bese korikori taumui.

Ori ese dubu e ḡovaia ahu

15 Dubu e haginia dinana ai, ori ese dubu, taravatu mauana kalagana, e ḡovaia ahu, ela bona hanua e boi, bena ita-itana na lahi na heto ela bonadaba e rere, dubu daenai. 16 Nega idoinai unu mo heto, ori ese e ḡovaia ahu dina ai bona lahi hanuaboi ai. 17 Bena ori ese kalaga e daetania negadia ai, Israel taudia na e tore isi, edia laolao ela; a ori e diho henia gabuna ai, Israel taudia na unuseni ai e taruha. 18 Iehova ena haheḡani dainai Israel taudia na e tore isi, bona Iehova ena haheḡani dainai idia na e taruha ori ese dubu e ḡovaia ahuva negana lalonai, idia na taruha ai e nohova. 19 Ena be ori ese dina hoho dubu e ḡovaia ahu, to Israel taudia ese Iehova ena haheḡani e laloa tao, bena asie tore isi. 20 Nega haida ori ese dina dia hoho dubu e ḡovaia ahu; bena Iehova ena haheḡani heḡereḡerena taruha ai e nohova, ma Iehova ena haheḡani heḡereḡerena e tore isi. 21 Ma nega haida ori na adorahi ai e diho, e mia rani; daba ai ma e dae, bena idia na e tore isi. Eiava dina ta hanuaboi ta e miava, bena e daetanidia negana ai idia na e tore isi. 22 ori ese dubu e ḡovaia ahu negana bema dina rua, eiava hua ta, eiava nega daudau, to Israel taudia taruha ai e nohova, asie tore isi; a e daetanidia negana ai idia na e tore isi. 23 Iehova ena haheḡani dainai e taruha, ma Iehova ena haheḡani dainai e tore isi; idia ese Iehova ena haheḡani e badinaia, Iehova ese Mose e haḡania heḡereḡerena.